Compostela, 26/06/2026 . A taxa turística foi algo moi debatido e que custou poñer en marcha pese a que a maioría dos implicados estaban a favor. O destino do recadado era unha das partes que máis custou negociar.
Cando está a piques de rematar o primeiro semestre do ano 2026 a Unión Hoteleira Compostela denuncia que aínda non sabe a que se destinaron os fondos recadados no ano 2025. Manifestan preocupación e piden ao concello transparencia.
Desde a asociación lembran que “a normativa autonómica establece que o 80 % da recadación debe destinarse a actuacións de turismo sustentable”, estimando que “no último trimestre de 2025, esta cantidade ascendeu a preto de 600.000 euros”.
Con todo, a Unión Hoteleira afirma que non ten constancia a día de hoxe das actuacións financiadas con estes recursos nin de que o Concello de Santiago fixese pública a información relativa á súa execución.
Como principal asociación hostaleira da cidade e entidade encargada da recadación do imposto, considera imprescindible que “déase unha explicación clara sobre o uso dado a eses fondos, cuxa finalidade era mellorar o modelo turístico”.
A organización sinala ademais que, case un ano despois da implantación da taxa turística, os establecementos hostaleiros continúan sen poder explicar aos seus clientes que melloras concretas supuxo este imposto para o turismo de Santiago, e lamenta a falta de resposta do Concello ás consultas realizadas, mostrando a súa preocupación e desconfianza pola ausencia de información pública sobre este tema.
Por iso, a UHC reclama ao Concello de Santiago que publique de maneira detallada os investimentos realizados con cargo á taxa turística, e que garanta unha xestión transparente duns recursos que por lei deben destinarse a gastos e investimentos relacionados co turismo sustentable.
