Muros, 2 de decembro do 2020 – O cine París de Muros recupera o seu esplendor como centro sociocultural co Plan Único da Deputación da Coruña.
O Presidente do ente provincial, Valentín González Formoso, visitou a localidade muradá para supervisar as obras. Cun orzamento total de 266.000 euros. os traballos inclúen a renovación da cuberta e a recuperación da fachada.
Valentín González Formoso foi recibido no salón de plenos pola alcaldesa de Muros, Inés Monteagudo, e membros da corporación. Na visita tamén participaron o deputado Blas García e a deputada Sandra González. O presidente provincial tamén aproveitou para visitar outras obras na zona vella de Muros incluídas no Plan Único como a mellora integral da zona de Chalón, onde se instalan novos pavimentos e tamén se aproveita para recuperar os tradicionais lavadoiros.
González Formoso lembrou que “o Plan Único aumenta este ano considerablemente para todos os concellos, e tamén para Muros, que conta cunha asignación de 600.000 euros dos que 140.000 euros irán destinados para facer fronte aos gastos sociais orixinados pola pandemia”.
Inés Monteagudo quixo “agradecer a visita do presidente e os investimentos da Deputación en Muros, que son imprescindibles” e recalcou que “a obra do Cine París era moi agardada porque a situación do edificio era dramática, pasou de ser unha actuación estética a ser de seguridade xa que corría risco de derrubamento. Agora dá gusto velo e cambiou a sensación dos comercios e establecementos desta zona”.
