Compostela, 17 de agosto do 2021 – Unha sentenza xudicial declara nulo o despedimento, pola empresa Freire, dun traballador e obriga a reintegralo ao seu posto na liña do aeroporto.
A empresa presentara unha carta de despedimento por baixo rendemento. A xuíza considera probado que tratouse dunha clara represalia por querer ser o candidato da CIG nas eleccións sindicais.
O procedemento alongouse máis do previsto polas sucesivas trabas que o empresario Gaspar Freire, puxo durante todo o proceso, motivo polo que foi advertido tanto pola xuíza como polo fiscal, que tamén apoiou a tese de que o despedimento era unha represalia por ser candidato da CIG e tamén solicitou a nulidade, que agora a sentenza ven de confirmar.
Readmisión
A sentenza condena a Empresa Freire a pagar ao traballador todos os salarios desde o despedimento, en febreiro de 2020; unha indemnización de 6.250 euros por danos e prexuízos e a readmitilo no seu posto de traballo, na liña do aeroporto de Santiago.
Esta parte da sentenza non poderá cumprirse neste momento, denuncia a CIG “porque é precisamente esa a liña que o Concello de Santiago entregou ao Grupo Monbus en decembro de 2020 e na que, irregularmente, non contemplou a subrogación dos traballadores e traballadoras, o que mantén un conflito aberto coa empresa e máis co concello, principal responsábel desta desfeita”.
Xa se ten presentado demanda contra o Grupo Monbus para a readmisión do traballador nesta liña, que como os outros 8 condutores e condutoras, debería de estar prestando servizos nesta liña do aeroporto.