Vedra, 9 de decembro do 2020 – O Conselleiro de Turismo e Vicepresidente da Xunta, Alfonso Rueda, inaugurou en Vedra a escultura en bronce dunha camelia coma homenaxe á propia flor e ao Camiño de Santiago.
A peza é obra do escultor Cándido Pazos. O artista, autor da Porta de Europa en Santiago ou as Esferas Armilares do Parlamento Europeo, inspirouse nunha camelia do seu propio xardín. A flor foi coidada durante os últimos cincuenta anos, é froito da fusión de outras tres e leva por nome Camelia Xacobea.
Alfonso Rueda destacou a importancia de potenciar un recurso turístico único en Galicia como a camelia para poñer en valor o patrimonio natural, cada vez máis demandado polos turistas, na actual situación marcada pola Covid-19
Rueda destacou tamén o papel do concello de Vedra na difusión da Ruta dos Xardíns da Camelia de Galicia e na difusión da tradición xacobea a través de moitas das súas esculturas. O Pazo de Santa Cruz é un dos 12 parques da Ruta e un dos 5 Xardíns de Excelencia Internacional da Camelia.
O alcalde, Carlos Carrillo, agradeceu a presencia do Vicepresidente e lamentou que a pandemia impedira que na celebración participaran todos os veciños de Ponte Ulla. O rexedor acompañou ademais a Alfonso Rueda nunha visita á área de interpretación dos muíños do municipio no que a Xunta de Galicia colaborou na súa adecuación.
No acto participaron, ademais de alcalde e vicepresidente, o propio escultor, Cándido Pazos, o Campión do mundo de Tríatlon, Iván Raña amigo persoal do artista, e concelleiros do municipio.
