Ames, 29/04/2026 – O vindeiro domingo, 10 de maio, en horario de 10.00 a 14.00 horas, volve a organizarse, por terceiro ano consecutivo, unha andaina teatralizada pola Costa do Mar de Ovellas, baseada no poema rosaliano “A probiña, que está xorda…!”.
O dito poema localízase nesa costa e está recollido no libro “Mordouelias. Rosalía e as Terras da Maía”, editado polo Concello de Ames e a Fundación Rosalía de Castro cunha introdución explicativa da escritora e experta rosaliana María López Sández.
Ruta teatralizada polos Quinquilláns e pola regueifeira Lupe Blanco
A andaina polo Mar de Ovellas desenvolverase coa colaboración do grupo teatral Os Quinquilláns e da regueifeira Lupe Blanco. Durante o camiño haberá diferentes paradas nas que o grupo de teatro Os Quinquilláns e Lupe Blanco nos achegarán á obra, á traxectoria e á vinculación da escritora co concello de Ames.
As persoas que queiran participar nesta actividade, que se vai realizar o domingo 10 de maio, das 10.00 ás 14.00 horas, teñen que enviar un correo electrónico ao enderezo normalizacion@concellodeames.gal indicando nome e apelidos, teléfono de contacto e lugar onde prefiren subir ao autobús (O Milladoiro ou Bertamiráns). O prazo de inscrición está aberto desde o ata o 7 de maio. Ofértanse 55 prazas que se cubrirán por orde de inscrición.
Lugares Rosalianos
Un día antes, o sábado 9 de maio, ás 12.00 horas, está aberto o prazo para inscribirse na visita aos lugares Rosalianos que marcaron a vida e obra de Rosalía. Neste caso visitarase o Pazo da Peregrina de Bertamiráns, para coñecer a vinculación de Rosalía e da súa familia paterna con este lugar. Esta actividade tamén estará teatralizada polos Quinquilláns. Para participar hai que enviar un correo electrónico ao enderezo turismo@concellodeames.gal. Esta actividade enmárcase dentro do convenio asinado polos Concellos de Ames, Brión, Dodro e Padrón para promover a ruta As pegadas de Rosalía.
Haberá tres visitas máis a lugares Rosalianos durante os meses de maio, xullo e setembro. O 23 de maio, ás 11.00 horas, visitarase a Casa de Rosalía, en Padrón. As inscrición hai que tramitalas en www.padronturismo.gal/inscricions. Para o 3 de xullo, ás 18.00 horas, está prevista a visita á igrexa de Bastavales. Neste caso as inscricións hai que facelas enviando un correo electrónico ao enderezo cultura@concellodebrion.gal.
Por último, o 4 de setembro, ás 20.00 horas, visitaranse As Torres da Hermida, en Lestrobe (Dodro). As persoas que estean interesadas en participar teñen que enviar un correo electrónico ao enderezo cultura@dodro.gal. As inscrición para todas as visitas son gratuítas e poden tramitarse ata o día previo de cada actividade. As prazas serán adxudicadas por orde de inscrición.
