Compostela, 25 de marzo do 2022 – A Alfombra Floral do Xacobeo 2022 será exhibida en 300 cidades dos cinco continentes converténdose nun evento de arte efémera único.
A presentación do deseño da alfombra, obra de Antonio Cunha, contou coa presencia do concelleiro de Turismo, Sindo Guinarte, acompañado polo presidente da Comisión Xestora de Entidades Alfombristas do Camiño de Santiago, Miguel A. García Correa.
O obxectivo é facer unha homenaxe a escala mundial ao Camiño de Santiago no día grande do Apóstolo, a través desta arte efémera de gran presenza en Galicia.
Un evento único
A iniciativa converterase no evento de exposición de alfombras florais máis grande celebrado nunca. Esta impulsado pola Comisión Xestora de Entidades Alfombristas do Camiño de Santiago. Polo momento rexistráronse máis de 300 cidades, das cales 105 son españolas (30 galegas), 74 italianas, 28 da India, 22 de México, 15 de Portugal e o resto repartidas polos cinco continentes.
O 25 xullo, co gallo da festividade do Apóstolo, exhibirase en Santiago, nunha localización aínda por concretar, unha alfombra co deseño escollido dun tamaño de oito por oito metros. O mesmo día, todas as vilas inscritas na iniciativa, exporán unha versión da alfombra que terá como base o deseño orixinal, pero que será elaborada seguindo a súa propia técnica e estilo, e na que terán que incluír o nome da cidade participante e os quilómetros que a separan de Compostela. Para o concelleiro Sindo Guinarte, “unha ocasión extraordinaria para realzar máis aínda o atractivo patrimonial da cidade”, e unha maneira de “tomar conciencia da universalidade de Santiago como destino de peregrinación”.
O deseño, seleccionado por votación de toda a comunidade de alfombristas, é creación do portugués Antonio Cunha de Setúbal e inclúe a Cruz de Santiago como o faro que guía aos peregrinos cara a poñente. Ademais, a alfombra é unha alegoría das vidreiras que se poden atopar na igrexas e catedrais ao longo do camiño a Santiago.
