Bisbarra, 18 de xuño do 2024 – O Tribunal Superior de Xustiza de Galicia, TSXG, paralizou cautelarmente o proxecto eólico Rodeira, promovido por Green Capital Power S.L. nos concellos de Vila de Cruces e Lalín.
A resolución do TSXG deixa temporalmente sen efecto a resolución da Dirección Xeral de Planificación Enerxética de 24 de abril de 2023. A suspensión manterase mentres non haxa sentenza relativa ao recurso contencioso-administrativo interposto por ADEGA contra este megaproxecto.
As razón esgrimidas polo TSXG para a paralización son, como na maioría dos casos, os indicios de que os danos que este proxecto exercería no medio ambiente poderían ser irreparábeis. ADEGA achegou probas de que “Rodeira” estarían proxectado nunha zona de máxima sensibilidade ambiental e moi próxima a diversos núcleos de poboación.
Esta situación afectaría de forma singular a especies de avifauna e outras catalogadas.O auto de suspensión explica que “a mera posibilidade de que se produza un dano irreparábel ou de difícil ou incerta reparación – aínda adoptando medidas correctoras sobre as zona protexidas-, ao ser prevalente o interese xeral en manter indemnes eses espazos públicos, sobre o particular que ten a promotora do parque eólico en executar de forma inmediata o proxecto autorizado, por moi lexítimo que sexa o seu dereito”.
Advirte o TSXG que as medidas protectoras, correctoras e/ou compensatorias non implican que se neutralice o risco que se trata de evitar coa medida cautelar se existen espazos de especial protección ou especies vexetais ou animais en especial risco de desaparición, como é o caso.
Afeccións á Rede Natura e á avifauna protexida
O proxecto eólico Rodeira autorizado pola Xunta prevía a instalación de dous aeroxeradores cunha potencia total de 12,6 MW e 240 metros de altura. Este polígono exercería unha influencia negativa sobre o espazo natural protexido como Rede Natura 2000 “Sistema Fluvial Ulla”, sobre o patrimonio cultural da zona -BIC Mosteiro de Carboeiro, o Santuario do Corpiño- ou sobre o Observatorio astronómico de Vila de Cruces.
Desde ADEGA tamén se considera incompatible este polígono eólico coa supervivencia da aves e morcegos que están en estado de vulnerabilidade (Circus pygargus, Circus cyaneus, Rhinolophus ferrumequinum, Myotis myotis) e en perigo de extinción, como o millafre real (Milvus milvus).
Rodeira, xunto cos parques eólicos Cunca e Mesada, tería sido resultado da fragmentación artificial dun único macroproxecto eólico, artellada coa finalidade de esquivar unha rigorosa avaliación ambiental.
