O Concello de Trazo informa da incorporación dunha nova coidadora ao CPI Viaño Pequeno, unha medida que responde ás necesidades trasladadas polo propio centro e polas familias a través da ANPA, así como ás xestións realizadas nas últimas semanas ante a Consellería de Educación.
Ao longo deste período, Trazo mantivo contactos directos coa administración autonómica para expor a situación do alumnado e a necesidade dun apoio adicional que garantise unha atención adecuada. Finalmente, a proposta foi atendida e o reforzo xa está operativo desde esta semana.
Esta incorporación permitirá mellorar a capacidade de atención personalizada ao alumnado; incrementar a seguridade e o acompañamento durante a jorna escolar e avanzar nun modelo educativo máis adaptado ás necesidades reais do centro.
A alcaldesa de Trazo, Fina Suárez, destacou que esta medida “é froito da colaboración constante entre o Concello, a comunidade educativa e a Consellería, cun único obxectivo: asegurar o benestar dos nenos e nenas de Trazo e ofrecer un servizo educativo á altura das súas necesidades”.
