Trazo inviste máis de cen mil euros nas melloras da rede viaria e espazos anexos nas conexións entre Berreo e Vilouchada
As estradas do rural precisan sempre de mantemento e melloras, máis aínda cando comezan as chuvias aínda que estas sexan cada vez máis escasas. O concello de Trazo ven de acometer unha importante actuación de mellora na rede viaria que conecta Berreo coa parroquia de Vilouchada, cun investimento total superior aos 120.000 euros.
A intervención tivo como obxectivo incrementar a seguridade dos condutores en esta estrada de Trazo. Prestouse un especial interese nun tramo con forte pendente e risco de desprendementos. As obras incluíron o reforzo do firme, a mellora da drenaxe e a execución dun muro de contención de reforzo, asegurando a durabilidade e o bo estado da infraestrutura.
A alcaldesa de Trazo, Fina Suárez, destacou que esta actuación forma parte do compromiso do goberno local de mellorar as comunicacións entre as parroquias e reforzar a seguridade nas estradas municipais.
A rexedora lembra ademais que “investir en infraestruturas é investir no benestar e na tranquilidade da veciñanza”. A obra de Berreo súmase ás diferentes melloras viarias realizadas polo Concello en outras zonas do municipio, coa finalidade de manter e modernizar as vías rurais, co obxectivo final de ofrecer uns desprazamentos máis seguros, cómodos e eficientes.
