Crearase unha comisión especial de seguimento do proxecto na que estarán políticos con representación no concello.
Comeza un posible conflito na bisbarra, a intención de instalar unha planta de biogás no concello de Trazo. Os veciños foron os primeiros que denunciaron este proxecto e xa anticiparon a súa oposición.
Segundo as fontes consultadas por Lindeiros o proxecto non so recollería puríns e residuos das granxas do concello, tamén recibiría os residuos de outros partes da comarca e mesmo residuos alimentarios non aptos para o consumo humano.
As mesmas fontes apuntan a que o lugar elixido para a planta está cualificado como só rústico polo que tería que modificarse o plan xeral de ordenación urbana xa que Trazo non dispón de chan industrial.
Tamén explican que afectaría a un humidal catalogado dentro da rede Natura 2000.
Por outra banda a conexión coa tubaxe principal que pasa por Oroso tería que facerse presuntamente por debaixo do río Tambre e por debaixo da vía do ave, unha canalización de algo máis dun quilómetro e medio,
A reunión mantida cos veciños hai uns días non aclarou moito máis do proxecto e polo momento non hai ningunha petición rexistrada no concello que teña que ver coa planta de biogás.
Hoxe na sección de opinión E logo… que foi? veciños e proxectos
Comisión de seguimento
O Pleno da Corporación de Trazo leva hoxe a pleno a creación dunha Comisión Especial de Seguimento sobre a Planta de biogás, unha “medida pioneira no ámbito municipal que ten como obxectivo garantir a máxima transparencia, control público e vixilancia técnica” sobre calquera posible proxecto vinculado á instalación dunha planta de biogás no termo municipal.
A proposta, impulsada pola alcaldesa Fina Suárez, nace coa vontade de dar participación a todos os grupos políticos, e establecer un espazo institucional onde se poida facer un seguimento activo do cumprimento estrito da legalidade urbanística, ambiental e administrativa.
“Queremos que todos os veciños e veciñas teñan a garantía de que aquí se vai actuar sempre con luz e taquígrafos, dentro da legalidade e coa máxima responsabilidade institucional”, subliñou a rexedora.
A comisión estará composta por representantes de todos os grupos políticos con representación plenaria.
Desde o goberno municipal remarcan que esta medida non responde a ningún trámite en curso nin a ningún expediente aberto, senón que se trata dunha iniciativa proactiva e preventiva para manter informada á cidadanía e ao conxunto da corporación sobre calquera movemento que puidera afectar ao territorio.
“Somos un goberno serio, responsable e comprometido coa defensa dos intereses de Trazo. Esta comisión é unha mostra de que non temos nada que agochar e de que estamos do lado da veciñanza nesta e en calquera outra materia”, concluíu Fina Suárez.
