Trazo, 26/03/2026 – Trazo leva a pleno a aprobación dos orzamentos que, previsiblemente, saíran adiante grazas á maioría absoluta da equipa de goberno. As contas son cualificadas desde o executivo municipal como “equilibradas e orientadas a seguir mellorando a calidade de vida da veciñanza”.
O documento económico de Trazo ascende a 4.390.000 euros, o que supón un incremento aproximado do 5% respecto ao exercicio anterior, mantendo a liña de estabilidade orzamentaria e sustentabilidade financeira.
Un concello “saneado: equilibrio e cero débeda”
Un dos aspectos máis destacados destes orzamentos é que o Concello continúa a manter unha situación de nulo endebedamento, garantindo unha administración “solvente e responsable coa xestión dos recursos públicos”. Un modelo que permite asegurar o funcionamento dos servizos municipais sen comprometer o futuro económico.
Máis investimento para seguir avanzando
Os orzamentos de 2026 apostan con forza pola mellora do municipio, destinando máis de 1 millón de euros a investimentos reais (1.037.392,14 €), o que representa arredor do 23,6% do total do orzamento.
Este nivel de investimento sitúa a Trazo nunha clara dinámica de crecemento e modernización, mantendo o esforzo inversor en niveis moi elevados.
Servizos públicos reforzados e atención social
O gasto corrente alcanza os 3,3 millóns de euros, garantindo o correcto funcionamento dos servizos municipais e reforzando áreas clave como os servizos sociais, cun incremento vinculado ao Servizo de Axuda no Fogar. Continuase ademais con políticas de apoio á natalidade, como o cheque bebé, que ascende a 1200€ por neno e as subvencións a asociacións e clubs do concello.
Un orzamento equilibrado e realista
Os ingresos municipais mantéñense estables, con especial peso das transferencias doutras administracións, que superan os 2,2 millóns de euros, así como das transferencias de capital que permiten financiar boa parte dos investimentos. Este enfoque “garante unhas contas realistas, equilibradas e adaptadas ás necesidades do concello”.
Compromiso coa veciñanza
O Goberno municipal destaca que “estes orzamentos responden a un modelo de xestión baseado en control do gasto público, eficiencia na xestión, prioridade nos servizos á veciñanza e impulso aos investimentos necesarios.
Unha folla de ruta “clara para seguir facendo de Trazo un concello que avanza, con estabilidade económica e proxectos de futuro”.
