Bisbarra, 15 de setembro do 2022 – As festas de Trazo prometen diversión este ano, polas boas ou polas malas, xa que actuará Kiko Rivera no Trazo Music Fest o día 23.
Rivera mantivo a finais do verán unha polémica coa Orquestra Olympus, acusando ao técnico de son de boicotear á súa “actuación”. O certo é que Olympus deixoulle o escenario e todo o equipo, incluído o técnico de son, pero segundo algunhas fontes o único que pasou é que non conseguiu convencer ao público.
Kiko Rivera terá ocasión de redimirse con público galego o día 23 dentro da programación das festas na honra de Sta. Eufemia e S. Mateo. En todo caso tamén estarán Treixadura que son unha garantía de boa música e bo facer.
Programación
Este mesmo venres 16 comeza a programación das festas coa Romaría de Sta. Eufemia. Será na catedral da Montaña, en Vilouchada. Os actos relixiosos celebranse durante toda a xornada e actuarán a Charanga da santa Compaña e as Orquestras Alianza e Olympus.
O mércores 21, no mesmo lugar, será a quenda das festas na honra de S. Mateo. A escritora e poetisa, nada en Trazo, Rosalía Morlán, será a encargada de ler o pregón.
A xornada contará coas actuacións do grupo Faiscas da Pontraga, grupo Unión y Fuerza e a Orquestra Los Satélites.
O venres 23 a partir das once da noite celebrase o Trazo Music Fest. Kiko Rivera, fillo de Isabel Pantoja, será xunto con Marcos Magén e DJ Sonic o encargado de animar aos asistentes.
As festas grandes de Trazo, o día 24, contarán co grupo tradicional Treixadura. O concerto será a partir das dez da noite na carballeira da Catedral da Montaña, en Vilouchada.
O remate das festas será ao día seguinte, o domingo 25, coa romaría na honra de Sta. Lucía, que contará, xa pola noite, co grupo Acordes.
