Bisbarra, 17 de novembro do 2022 – A Deputación arranxará as estradas de Trazo que se viron afectadas polas obras da ponte dobre o rego Gatofero.
O presidente da Deputación da Coruña, Valentín González, e a alcaldesa de Trazo, Josefina Suárez, asinaron un convenio para financiar a obra. Co acordo o organismo provincial actualiza de 142.721 a 164.306 euros o investimento necesario para financiar a reparación das vías do concello. Ao acto asistiu tamén o deputado de Patrimonio e Contratación, Xurxo Couto.
As actuacións levaranse a cabo en dous tramos. O primeiro de Ponte Albar a Chaián (2,4 quilómetros), no que se repararán fochancas e afundimentos ocasionados polo incremento do volume de tráfico. Tamén se reparará a canalización danada, un tramo de beiravía e, para completar a actuación, instalarase sinalización horizontal e vertical.
Por outra banda, realizaranse tarefas de acondicionamento da vía que conecta o cruzamento de Chaián coa ponte sobre o Río Tambre, ao longo de 1,3 quilómetros. A plataforma repararase co fresado e reposición das zonas deterioradas, estendendo finalmente un microaglomerado en frío en todo o seu ancho. Tamén se arranxarán os sumidoiros afundidos polo paso de vehículos pesados sobre eles e o tramo de canalización afectado. Por último, refaranse un pozo e un sumidoiro e instalarase nova sinalización.
