Compostela, 13/03/2026 – A deputada do Bloque Nacionalista Galego Saleta Chao fixo un chamamento á Xunta para que “actúe con rigor” e visite a zona de Conxo para comprobar “in situ” o impacto das obras do eixo de mobilidade sostible entre O Milladoiro e a Estación Intermodal.
A deputada nacionalista detallou o que cualificou como unha “auténtica trapallada” administrativa ao redor dun proxecto que, asegura, acumula informes técnicos desfavorables e advertencias de institucións como a Fiscalía Europea ou o ICOMOS.
Chao lembrou que o proxecto, financiado con fondos europeos, afecta a unha contorna de “inmenso valor patrimonial, cultural e paisaxístico”, enmarcada polas efemérides do Banquete de Conxo (1856) e a declaración de Compostela como Patrimonio da Humanidade (1985).
A deputada censurou a “falta de rigor” do goberno do PP na Xunta, preguntándose “como é posible que se asinase favorablemente en 2023 unha resolución de patrimonio” cando os informes técnicos propios da administración autonómica eran negativos.
“No seu empeño por atravesar Conxo como se fose un territorio de conquista, a Xunta levou a administración galega ao ridículo absoluto”, sentenciou Chao, quen lembrou que as obras no tramo do Bosque do Banquete tiveron que ser suspendidas en maio de 2025 tras unha resolución desfavorable da Dirección Xeral de Patrimonio Cultural e un informe do ICOMOS. “A Xunta xustificou a suspensión na oposición do Concello, agochando que o motivo real era o ditame do ICOMOS e a súa propia resolución de Patrimonio”, engadiu.
A deputada do BNG preguntou á Xunta sobre as modificacións técnicas que permitiron retomar as obras tras o parón. “Agora que se retoma o proxecto, queremos saber en que consistiron as variacións técnicas para que, tras unha resolución desfavorable, agora os informes sexan favorables”, exixiu Chao. Así mesmo, preguntou se estas modificacións afectaron á dotación orzamentaria do proxecto e se se tiveron en conta as recomendacións do ICOMOS e a investigación da Fiscalía Europea.
Durante a súa réplica, Saleta Chao foi moi crítica coa execución actual das obras, especialmente no tramo entre a rúa de Suarribas e a ponte Pereda, unha zona que cualificou como “das máis sensibles” debido ao seu risco de inundacións recoñecido pola propia Xunta. A nacionalista mostrou imaxes da intervención para denunciar que, lonxe de “minimizar o impacto” como recomendan os informes técnicos, se está a actuar de forma agresiva na ribeira do río Sar.
Finalmente, a deputada do BNG reclamou á Xunta que, de oficio, restaure o estado orixinal do Bosque do Banquete de Conxo nos tramos onde xa se actuou antes da suspensión e que abandone a súa “fixación” por atravesar esta área protexida”.
