Teo, 14 de decembro do 2020 – Toysal, ven de presentar unha querela criminal contra o alcalde de Teo, Rafa Sisto; a concelleira de urbanismo, Uxía Lemus e o arquitecto municipal, Ignacio Soto.
A denuncia foi admitida a trámite polo xulgado de instrución número un de Santiago. Preséntase polos presuntos delitos de coaccións, prevaricación, malversación de fondos públicos e falsidade documental en relación coa súa actuación fronte á canteira de Casalonga propiedade da empresa.
A empresa explica nun comunicado que na intención de reactivar a explotación atoparon “unha oposición total e frontal por parte dos querelados, que non dubidaron en absoluto en utilizar todos os medios, legais e ilegais, para impedilo”.
Toysal considera ilícitas cuestións como “atribuírse a propiedade dun camiño privado sen título algún; colocación arbitraria, sen fundamento nin expediente administrativo, de sinais de tráfico nunha finca particular para impedir o paso de maquinaria pesada; investir fondos públicos nesa parcela privada sabendo que non era unha vía municipal, para facilitar así o transito dos opositores á canteira; ordenar á Policía Local que multe, fóra das súas competencias e ámbito territorial, a calquera vehículo da explotación, e finalmente impedir pola forza a Toysal a colocación dunha barreira na súa propiedade”.
A empresa insiste na nota de prensa no papel da Policía Local e asegurando que no 2009 “o propio xefe da Policía Local de Teo negábase a realizar roldas de vixilancia por esta pista por tratarse dun espazo particular”. Tamén relatan que “cada vez que un vehículo accede á explotación, membros da plataforma veciñal avisan ao alcalde e á concelleira, que mandan inmediatamente axentes municipais a multar ou a impedir fisicamente o movemento de maquinaria baixo ameaza de inmobilización ou precinto”. A Policía Local, segundo puntualiza a querela, só ten competencias para actuar no solo urbano, lonxe da zona onde se atopa a canteira, “co que resulta especialmente grave a orde, pois para lograr un fins políticos estase abocando aos axentes a cometer delitos de prevaricación”.
O alcalde fala de “embarrar o terreo de xogo”
Rafa Sisto considera que non ten sentido a querela. O alcalde explica que si o que se quere e recuperar a propiedade será eso o que hai que denunciar e cre que se trata de “máis circo que efectividade”
Sobre a repentina actividade pública de Toysal nas últimas semanas, Sisto considera que é resultado da frustración ao non conseguir impoñer os seus desexos dun “vertedoiro encuberto”.
No momento de publicar esta nova o concello de teo non tiña aínda copia da querela presentada.
