O concello de Touro organiza unha xornada encamiñada a por en valor, e descubrir, moito do patrimonio que atesoura este municipio.
Moitos concellos galegos, como o de Touro, teñen unha cantidade, difícil de calcular, de patrimonio pouco coñecido. Restos de distintas épocas que poñer en valor e dar a coñecer; moitas veces aos propios veciños e, en todas, ao resto da `poboación.
“Touro oculto, un patrimonio por descubrir” é unha actividade que ten precisamente ese obxectivo. Organizada polo concello, trátase dunha xornada na que está convidada toda a veciñanza, e os posibles visitantes, o vindeiro día 22.
Durante a mañá, entre as 9:15 e as 14:00 horas, un autobús do Concello levará ás persoas participantes por un itinerario que percorrerá diferentes localizacións de interese histórico, arquitectónico e cultural, algunhas delas non accesibles ao público fóra desta xornada especial.
Entre as paradas previstas inclúense pazos, construcións tradicionais e enclaves rurais de grande valor patrimonial, así como a visita excepcional ao pazo que serviu de escenario á serie de Netflix do momento “Animal”.
A actividade é totalmente gratuíta, mais require inscrición previa ata o 19 de novembro. As prazas son limitadas e cubriranse por orde de solicitude.
As inscricións poden realizarse a través do correo electrónico turismo@concellodetouro.gal ou mediante o código QR dispoñible no cartel informativo. O punto de encontro será a Casa do Concello de Touro, desde onde partirá o bus ás 9:15 horas.
Con esta proposta, o Concello de Touro continúa a súa aposta pola valorización do patrimonio local e o turismo sostible, ofrecendo unha oportunidade única para descubrir os tesouros ocultos que agroman en cada recuncho do municipio.
