O goberno de Touro parece seguir os pasos avanzados como argumentos para a presentación da moción de censura. Despois de contratar a unha reputada avogada para contar cun asesoramento xurídico profesional agora piden a participación da veciñanza nos distintos procedementos.
O alcalde de Touro, Jesús José Reboredo, ven de remitir unha carta á Secretaría de Industria e desenvolvemento enerxético pedindo que a participación da veciñanza como parte interesada nos trámites relativos ao novo proxecto mineiro se faga “de oficio e se recoñeza á veciñanza residente como parte interesada no procedemento”.
Esta petición deriva da imposición da Xunta de acreditarse individualmente como persoa afectada para poder ter acceso a todos os procedementos relativos á Mina. Na carta Reboredo lembra que non debería ser preciso que a veciñanza tivera que demostrar a titularidade das terras nin os prexuízos que o proxecto pode causar “cando é evidente a súa vinculación co ámbito territorial”.
Na carta o goberno de Touro indica ademais que a petición faise con ánimo de “reforzar a transparencia, a seguridade xurídica e a confianza da cidadanía nas institucións, así como asegurar que o proxecto se desenvolva coa máxima participación”.
