Bisbarra, 8 de setembro do 2022 – O grupo socialista de Touro denuncia que o concello perdeu ata 23.000 euros en subvencións para o departamento de cultura.
A voceira socialista Gemma López concreta en tres as subvencións perdidas. Son axudas proporcionadas pola Deputación da Coruña destinadas a festivais, festas patronais, comisións de festas e por outra banda a técnicos de normalización lingüística.
López explica que “no que vai de ano levamos perdidos bastante máis de 23.000 € en subvencións de cultura pola mala xestión e o pasotismo da Concelleira Adela Iglesias e lamentamos que lle boten a culpa ao funcionario de turno cando todos sabemos que non é así”.
A concelleira socialista engade que a realidade do concello é “un departamento de cultura que perde unha subvención tras outra e que é incapaz de facer un programa cultural para todas as veciñas e veciños e para todas as parroquias por igual”. A voceira socialista esixe á Concelleira de Cultura en particular, e ao Goberno do popular Ignacio Codesido en xeral, “especial dilixencia nas súas funcións en beneficio das e dos veciños de Touro”.