Bisbarra, 14 de febreiro do 2023 – O Movemento Veciñal de Touro critica que o goberno municipal dedique a maioría do Plan Único da Deputación a gasto corrente no canto de investir e arranxos.
O Movemento Veciñal, xa constituído como partido de cara as eleccións de maio, denuncia que eses fondos servirán para pagar o salario dunha concelleira. Engaden que poderían servir para mellorar o saneamento, infraestruturas hidráulicas ou obras de distintos tipos.
O total dos cartos destinados a estes gastos ascende a 271.566€. Movemento denuncia ademais que ao negarse a investir na rede de saneamento o goberno municipal vai rematar a lexislatura sen ningunha obra en esta área.
Engaden que tampouco se investira na rede de abastecemento e denuncian os graves problemas que sofre a presa de captación e bombeo en Santaia. Unha situación que pon en risco o abastecemento de auga de cara ao verán.
Tamén poñen o foco na piscina municipal que , explican, “é un auténtico coador xa que perde auga en cantidades astronómicas”. Consideran a actitude do goberno de “irresponsable e temeraria ao condicionar e poñer en risco a actividade económica da veciñanza e condicionándoa día a día”.
Un dos poucos investimentos aprobados foi a mellora da pista da Capela en Novefontes. Trátase dunha demanda que se leva repetindo catro anos. Unha obra non exenta de crítica xa que a oposición di que “non irá con aglomerado a pesares de que se utiliza aglomerado para asfaltar pistas no medio do monte. Novefontes ao alcalde só lle interesa para ir pedirlle o voto”.
Tamén foi moi cuestionada a decisión de destinar o Plan Social, incluído no Plan Único da Deputación, á contratación dunha traballadora social. Esta persoa encargarase de xestionar as axudas enerxéticas da Deputación e terá un custo de 9.000 euros durante seis meses. Unhas axudas que poden alcanzar os 30.000 euros. O Movemento Veciñal de T0ouro considera que “os recursos persoais de servizos sociais que ten o concello son totalmente suficientes e eses 9000€ deberían ir a axudar á veciñanza”.
