Movemento Veciñal de Touro, Partido Galego e Partido Popular votan en contra dunha moción do BNG, e do concelleiro non adscrito Darío Rey, que pedía que o goberno municipal se acudise nos procesos xudiciais
O pleno ordinario de abril do 2025 en Touro ben podería celebrarse hai unha década ou dúas. Unha moción en contra do proxecto mineiro foi rexeitada por 9 de11 concelleiros. Os argumentos para este voto en contra son, como pouco, inesperados.
A moción foi presentada polo BNG de Touro. Pedía no primeiro punto instar á Xunta a anular a declaración de Proxecto Industrial Estratéxico. No segundo instaba aos órganos medio ambientais a unha declaración de impacto ambiental negativa. Remataba cun terceiro punto instando de novo á Xunta a que obrigue á empresa a restaurar os terreos segundo os compromisos adquiridos no seu día.
O concelleiro non adscrito Darío Rey, que hai meses deixou o goberno municipal, pediu engadir un cuarto punto solicitando que o concello se acudise como parte afectada nos procesos xudiciais que se abran.
Le en Lindeiros todas as informacións sobre os conflitos mineiros en Galicia
Argumentacións sorprendentes
O voceiro do Partido Popular, Jesús José Reboredo, defendeu o proxecto como o único xeito de que se minimice a contaminación. Chegou a dicir que “Non nos enganemos, non podemos pecar de inxenuos, dicir que a empresa vai poñer os cartos… non os pon para evitar a contaminación e que os vai poñer para a restauración, a única alternativa e que a Xunta ou algunha administración expropiase os terreos, hai que ser realista”.
Máis sorprendente foi o dito polo alcalde, Roberto Castro do Movemento Veciñal de Touro, que asegurou “o goberno non pode aceptar esta moción, entendo que a corporación debera telo en conta, porque na fundamentación o que expón é sobre informacións xornalísticas; todo o que contén, o punto 3 non pero os outros si, están baseados nunha información xornalística [ ] ata onde este alcalde sabe todo o relativo á fiscalía, á cualificación de penas, é unha información xornalística”.
Como xa contamos en Lindeiros, na causa aparecen como acudidos Ecoloxistas en Acción como acusación popular ambiental. Esta organización xa fixo declaracións sobre as peticións da Fiscalía polo que deben saber do que falan.
Tras un debate no que en todo momento se mantiveron estas posturas con similares argumentos, só votaron a favor o voceiro do BNG, Xoán Antón Louzao, e o concelleiro non adscrito Darío Rey. Parece que en Touro pasan os anos pero non o tempo.
Podes ver o pleno completo en Youtube
https://www.youtube.com/live/mOT-ecraDR8?si=ihKlcZPD_nRlqDwF
