Bisbarra, 4 de maio do 2023 – O Movemento Veciñal de Touro presentará denuncia penal polo caso da oposición a medida da filla do candidato do PP á alcaldía.
Movemento Veciñal explica que a denuncia preséntase tras a negativa do goberno municipal a convocar un pleno extraordinario. A intención da oposición era que o pleno instara á xunta de goberno local paralizará o proceso de concurso oposición e anulara as bases.
En decembro pasado o Movemento Veciñal de Touro preguntou nun pleno ao alcalde, Ignacio Codesido, “se a coincidencia entre a puntuación que outorgan as bases e a experiencia laboral da suposta beneficiada eran casualidade ou fora feito a propósito” ao que o rexedor non contestou.
No pleno de marzo, ao xurdir de novo a cuestión, o alcalde afirmou que “non houbo casualidade”, reafirmando para o Movemento as sospeitas de amaño. As bases obxecto da denuncia foron aprobadas sendo secretario accidental o actual candidato popular e ao mesmo tempo pai da presunta beneficiada.
A responsabilidade das bases motivo da denuncia recaería sobre a xunta de goberno local da que formaban parte o actual alcalde Ignacio Codesido, Jesús Martínez Pereira, Alfredo Souto Castelo e Adela Iglesias, exercendo de secretario accidental da mesma Jesús Roboredo González (actual candidato popular á alcaldía e pai da presunta beneficiaria).
Unha puntuación aumentada
O Movemento Veciñal de Touro explica polo miúdo o motivo da denuncia penal e as sospeitas de prevaricación. As bases outorgan un total de 36 puntos de 100 por experiencia laboral, a razón de 1 punto por mes de traballo nese posto. Este baremo coincide coa persoa beneficiada pola oposición polo que obtén a máxima puntuación posible.
Pero este baremo, comparado co de outras convocatorias, valora o dobre a experiencia na administración local desvirtuando o criterio de igualdade. Movemento Veciña engade que “O amaño queda evidenciado ao comparar o baremo de puntuación destas bases co doutras convocatorias nas que se puntúa a razón de 0,1 puntos por mes traballado e até un máximo de 10 puntos sobre 100. Nas bases amañadas puntúase até dez veces máis para conseguir que a presunta beneficiaria acade a máxima puntuación con só tres anos de experiencia”.
Estas bases non só foron denunciadas polo partido veciñal senón que tamén foron obxecto de recurso por parte de diferentes afectados durante o período de información pública; recursos a día de hoxe aínda sen resolver.
