Touro, 21 de outubro do 2019 – A pasada semana Juancho López de Uralde, ex director de Greenpace e Deputado, visitou a zona da Touro e O Pino para coñecer o proxecto mineiro e debater sobre el.
López de Uralde foi director de Greenpace España durante unha década; cofundandor de Equo e nas últimas lexislaturas Deputado Nacional por Unidas Podemos.
O encontro serviu para intercambiar experiencias e coñecer a zona afectada. Os colectivos explicaron o traballo que levan feito para parar a reapertura e recibiron o apoio do Deputado que contou as súas propias experiencias en casos como este.
No transcurso dun interesante debate falouse da necesidade de reformar a Lei de minas de 1973 que de ningunha maneira pode ser
un marco axeitado para regular a realidade actual. Tamén se comentaron outras do ámbito autonómico como a Lei fomento da implantación de iniciativas empresariais. Esta lei é coñecida como “lei depredación” e da facilidades no acceso e tramitación de iniciativas privadas de grandes empresas fronte ao que é de todos, e que afecta a moitos ámbitos, dende a minería aos eólicos.
Tamén se tocou a falta de regulación e vixilancia adecuada na xestión de residuos, un negocio en auxe, que, coa desculpa de “restaurar” “espazos degradados” está a proliferar nas vellas minas e canteiras, a costa da saúde e calidade de vida da poboación e do medio ambiente en xeral.
