Nunha época como a do Entroido na que os concellos compiten por atraer público aos desfiles Touro marcará este ano a diferencia. O concello programa o Ulla Fest, un festival de música urbana que se celebrará o vindeiro día 13.
En realidade o Ulla Fest Tempos de Entroido chega a súa terceira edición pero cun novo enfoque. Celebrarase no Campo da Festa de Fonte Díaz, cunha carpa climatizada, a partir das oito da tarde. A entrada será de balde o que garante unha boa asistencia.
Á espera do cabeza do cartel, están xa confirmados Willow GHZ, Kike Varela, Movinfast (DJ set), Lg1do Lil Sam e DJ Capy.
Concurso de Entroido
Touro seguira a festa ao día seguinte do Ulla Fest co concurso de Entroido. A cita no mesmo lugar, a carpa climatizada de Fonte Díaz, a partir das seis e cuarto da tarde. As inscricións realizaranse ata esa mesma xornada cunha solicitude no rexistro xeral do concello, na sede electrónica o esa xornada de 17:00 a 18:00 horas na mesma carpa.
A categoría infantil e xuvenil individual, ata 14 anos, recibirá un primeiro premio de 150 € e un segundo de 100 €. Tamén ata os 14 anos pero a de grupos ou parellas, está dotada con 250 € no primeiro premio e 200 € no segundo.
A categoría de adultos individual, máis de 14 anos, terá no primeiro premio 150 € e no segundo 100 €. No caso das parellas e grupos de adultos, o primeiro premio recibe 250 € e o segundo 200 €.
Finalmente a categoría de asociacións está dotada cun primeiro premio de 350 € e un segundo de 250 €. Unhas citas que convidan a pasarse este Entroido por Touro e desfrutar da música e dos disfraces.
