Touro, 30 de maio do 2022 – O concello de Touro celebrará este martes un novo pleno extraordinario sobre a situación, presuntamente ilegal, na que se atopa a empresa TEN (Tratamentos Ecolóxicos do Noroeste).
A emprsa ten aberto un expediente de reposición da legalidade urbanística pola falta de licencias nas súas instalacións. O expediente foi o resultado das inspeccións urbanísticas derivadas doutro pleno extraordinario celebrado no mes de novembro.
A empresa opera nos antigos terreos da mina de Touro con lodos de depuradora e outros residuos. Nos últimos tempos ven acumulando queixas e denuncias dos veciños polos cheiros e malestar que provoca na contorna.
O Movemento Veciñal de Touro lembra que segundo a Lei do Solo o alcalde, que é quen ten as competencias, tería que ordenar o cese da actividade. O grupo municipal denuncia que o rexedor, Ignacio Codesido, “ trata de esquivar a Lei ao non notificar o cese da actividade, situación que a empresa aproveita para seguir funcionando con normalidade cas consecuentes molestias que causa á veciñanza”.
Irregularidades desde o inicio
Este é o primeiro expediente de legalidade urbanística que se lle abre a TEN, a pesares de que a actividade á marxe da lei vén desde os inicios. Desde o 2005 ata o 2011 a empresa funcionou sen a necesaria licenza municipal de obras e actividade.
O Movemento Veciuñal lembra que TEN “converteuse así no maior xestor de lodos e residuos de depuradora de Galicia, con consecuencia de cheiros pestilentes e afección á calidade do medio ambiente. Esta afección causa molestias á veciñanza na súa vida diaria e provoca a devaluación das súas vivendas nas áreas máis afectadas e na Fonte Díaz”.
O Movemento Veciñal, principal partido da oposición, presentou varias propostas a debater no Pleno dirixidas a que o Concello (o Alcalde) cumpra coa lei para que TEN cumpra a lei a fin de que non se causen molestias á veciñanza, nin afeccións á saúde das persoas nin do medio.
