Touro, 25 de marzo do 2022 – A Xunta de Galicia resolve de xeito negativo o recurso de reposición presentado por Cobre San Rafael contra Declaración de Impacto Ambiental, DIA, negativa emitida en xaneiro do 2020.
Hai que remontarse ao 2017 para explicar o sucedido. En aquel ano a empresa presenta un proxecto de extracción de cobre a ceo aberto na mina de Touro xunto con un plan de restauración. En xaneiro do 2020 emítese desde a Xunta unha DIA negativa que, en febreiro do 2021, serve de base para a denegación definitiva do proxecto presentado.
Recurso de reposición
Cobre San Rafael presentou un recurso de reposición ante denegación. No documento acusaba a Autoridade Ambiental de actuar de xeito arbitrario. Lindeiros recuperaba en decembro do 2021 unha entrevista co CEO de Atalaya Mining, Alberto Lavandeira, na que dicía que garantían a seguridade pero que os técnicos da Xunta “non os crían”.
Unha negativa sólida
A Xunta de Galicia lémbralle a Cobre San Rafael que “no expediente existe material probatorio máis que suficiente para acreditar a legalidade da resolución impugnada e así consta no procedemento que garanten o acerto dos pronunciamentos contidos no acto obxecto recurso, e a especial transcendencia para os efectos probatorios que ten a DIA de 28 de xaneiro de 2020 negativa, ao provir do órgano administrativo técnicamente especializado en materia ambiental”.
A empresa ten a posibilidade aínda de presentar un recurso contencioso administrativo, baseado e erros de tramitación, que non ten moitas posibilidades de prosperar
Restauración pobre
Por outra banda no pleno municipal de Touro desvelouse que a cantidade prevista pola empresa para o drenaxe da mina é de 38.146 euros, moi lonxe dos teóricos 1,9 millóns anunciados en meses pasados. O proxecto deixa fóra extensas zonas de canles e marxes fluviais onde se acumulan millóns de toneladas de lodos de arrastre contaminados por metais pesados procedentes da antiga mina de cobre.
