Touro, 22 de xullo do 2020 – Hoxe celébrase o Día Mundial contra a Minería a Ceo Aberto e a Plataforma de Touro ven de emitir un comunicado para lembralo.
O obxectivo do desta xornada é lembrar e advertir a toda a poboación do dano e a contaminación que a minería a ceo aberto provoca ao medio ambiente. Trátase dun negocio que só deixa un beneficio económico para uns poucos e unhas consecuencias fatais para todos, con danos irreparables para o entorno e a saúde.
A colectivo de Touro quere lembrar que se trata dun método industrial consistente en remover grandes cantidades de solo e empregar, para a separación do mineral, sustancias tóxicas como cianuro, mercurio ou ácido sulfúrico, xerando sobre o terreo explotado drenaxe aceda de minas, que derivará en contaminación dos ríos, mananciais e acuíferos ao seu paso pola explotación ata o mar. Trátase do proceso extractivo máis económico posible e tamén o máis prexudicial, tanto a curto como a longo prazo.
Ademais da drenaxe aceda, tamén son consecuencias ambientais destacables da minería a ceo aberto a contaminación do aire, os impactos sobre a flora e a fauna, cuxos hábitat se ven modificados, a alteración da paisaxe e os conflictos entre a comunidade local e a empresa mineira, entre outros danos.
Aínda que o día mundial contra a minería a ceo aberto se celebre de maneira especial nos países iberoamericanos, cada vez son máis as plataformas da Península Ibérica que realizan esta reivindicación pola situación na que se encontra o territorio. Nos últimos anos, as ameazas da minería a ceo aberto a este lado do Atlántico non deixaron de medrar, con proxectos que non só poñen en risco o medio ambiente, senón tamén o benestar e modos de vida da veciñanza, especialmente nas zonas rurais, xa de por sí agonizantes por mor do éxodo dos pobos ás grandes cidades.
Desde a Plataforma Veciñal Mina Touro – O Pino NON explican que no seu caso “pese á emisión da Declaración de Impacto Ambiental (DIA) negativa o pasado mes de xaneiro, aínda estamos agardando o momento en que o departamento de minas da Xunta de Galicia emita a resolución definitiva do proxecto de explotación de cobre a ceo aberto que promove Cobre San Rafael. A estas alturas, un retraso debido á situación xerada pola pandemia do Coronavirus xa non sirve como xustificación para demorar tantos meses unha resolución que está clara a todas luces”.
Nos últimos días, o Tribunal Supremo ditou unha sentencia na que acorda non permitir a eliminación dos informes de avaliación de impacto sobre a Rede Natura 2000 para determinadas actividades. É dicir, que todos os proxectos que se pretendan levar a cabo en territorio declarado Rede Natura 2000 teñen que ter un control ambiental. O Proxecto de Touro afecta ao LIC Sistema Fluvial Ulla – Deza, que é unha Zona de Especial Protección da Rede Natura, e no pasado xa ten sufrido a pegada da antiga mina de Touro, como quedou demostrado no Proxecto Life + Margall Ulla.
As veciñas e veciños de Touro e O Pino aproveitan a data sinalada para lembrar que “non baixamos a garda ante a ameaza da minería a ceo aberto que aínda non abandonou os nosos municipios, nin ante os pasivos ambientais que existen no entorno derivados da antiga explotación e das actividades que actualmente se levan a cabo nese terreo”.
