Estivo organizado polo Club de béisbol de Os Tilos e contou con equipos de Cambre e Lugo en categorías alevín e infantil
Teo, 8 de novembro do 2016 – O pasado sábado 5 o club de béisbol Os Tilos de Teo celebrou a primeira edición do Torneo de Outono de béisbol, coa participación dos clubs convidados Cambre e Lume de Lugo que, xunto co anfitrión presentaron equipos de categoría alevín e infantil.
O evento tivo lugar nas instalacións provisionais da Cañoteira, en Cacheiras, ao longo de todo o día. Ao campo achegáronse numerosos pais das futuras estrelas do béisbol galego, gozando de deporte, música, cantina solidaria e ambiente festivo, aderezado coa calorosa acollida que adoita dispensar o Béisbol Os Tilos.
Na categoría alevín estreáronse na competición varios deportistas de cortísima idade que desempeñaron con entusiasmo o seu papel, para delicia do público en xeral e dos seus pais en particular. A clasificación quedou como segue:
Campión: Cambre
2º: Os Tilos
3º: Lume (Lugo)
Os infantís ofreceron unha final apertada e espectacular, valedoira para o calendario federativo, entre Os Tilos e Cambre. Ao final impuxéronse os primeiros por 9 carreiras a 4. Lume acusou a mocidade do seu equipo, que ,con todo, presentou boas condicións e potencial. Clasificación:
Campión: Os Tilos
2º: Cambre
3ª: Lume (Lugo)”.
