Bisbarra, 2 de outubro do 2024 – Os alcaldes de Dodro, Xabier Castro; Padrón, Anxo Arca; e Rois, Ramón Tojo clausuraron o obradoiro de emprego Terras de Iria, impulsado polos tres concellos.
Xunto aos rexedores participaton na entrega de diplomas a delegada da Xunta na Coruña, Belén Docampo e o director territorial da Consellería de Emprego, Comercio e Emigración, Juan José Couce. O obradoiro, que comezou no 2023, deu formación a 15 mozos e mozas dos tres concellos participantes.
O obradoiro formou a estes rapaces na confección e publicación de páxinas web. A formación contou cunha achega da Xunta de máis de 498.000 euros. O traballo feito polo alumnado queda recollido na web 2023.terrasdeiria.com
O alumnado do obradoiro de emprego Xuventude Terras de Iria 2023 desenvolveu traballos como a ampliación da web Coñece Terras de Iria, incorporando percorridos virtuais, creando roteiros en bicicleta polos tres concellos, publicitando a súa actividade comercial e inventariando as instalacións deportivas dos mesmos.
Realizaron ademais un manual explicativo desta páxina web, crearon plans de voo para drons e zonificaron as áreas de fauna e flora de Rois, Padrón e Dodro. A delegada subliñou a importancia destes traballos que permitirán dar un salto cualitativo a esta web para ofrecer máis e mellores servizos a todos os visitantes que queren achegarse e coñecer estes tres concellos.
Belén do Campo tamén resaltou que estes obradoiro reforzan a colaboración institucional entre a Xunta e os concellos, e confirmou que os tres municipios de Terras de Iria volverán contar este ano cun novo obradoiro para formar a mozos e mozas de 18 a 30 anos de Rois, Padrón e Dodro grazas a un apoio da Xunta de máis de 411.000 euros. Este obradoiro xa ten preseleccionado ao alumnado participante.
