Bisbarra, 8 de setembro do 2023 – O vindeiro domingo terá lugar en Oza a XXII edición do Concurso cabalar Concello de Teo no que haberá actividades de doma clásica e concursos de beleza.
O vixésimo segundo concurso cabalar de Teo comezará as dez da mañá cos poldros e poldras indefinidas para continuar as dez e media cos cabalos e eguas da mesma categoría. Unha das partes máis vistosas da competición, as dos percheróns, terá lugar a partir das doce do mediodía.
Ao longo da xornada haberá competicións de doma clásica, ambientación musical, cantina e posto de polbo e ao caer a tarde, as seis e media, exhibición de arrastre e entrega de premios.
Un pouco de historia…
A primeira edición da Festa do Cabalo en Teo celebrouse no ano 1991. Esta iniciativa popular foi nos inicios liderada polos afeccionados do mundo cabalar do municipio, e contou co apoio do Concello de Teo.
A festa apareceu vinculada á Feira do San Martiño en Francos como un xeito de animala e mostrar outras razas de cabalo da contorna. A primeira edición celebrouse no inverno, na carballeira de Francos. Por mor das condicións climatolóxicas, decidiuse posteriormente celebrala no verán para mellorar o espectáculo.
Agora desde o concello tratan de recuperalo xa que “estivo consolidado, con alta participación da veciñanza, alta tradición e gran arraigo”. Desde o consistorio engaden que “Cando se fala de Teo, estase a falar do mundo cabalar, da feira do San Martiño de Francos, do Entroido dos Xenerais da Ulla. Estase a falar en definitiva dun protagonista inequívoco: o cabalo”.
