Máis de trinta actividades que o concello de Teo organizará ao longo de todo o ano deseñada polas áreas de Turismo e Cultura
O concello de Teo ven de presentar a campaña de difusión do concello prevista para este 2025 e que leva como nome xenérico Teo Turismo 2025. Unha programación que ten como obxectivo principal difundir o concello e promover alternativas de ocio para a veciñanza.
Ademais de rutas, obradoiros e mostras, tamén se celebrarán eventos de maior proxección como a Festa da Nai, o Concurso Morfolóxico Cabalar, a Festa Cabalar do San Martiño de Francos ou a campaña de Nadal
Esta campaña turística lanzouse por primeira vez o pasado ano e foi un gran éxito entre os veciños e veciñas de Teo, pois ofreceu máis de 40 actividades sostibles que tiveron moi boa acollida entre os participantes.
O programa deste 2025 está composto por unha oferta de máis de 30 experiencias turísticas sostibles, organizadas novamente en catro campañas coincidentes con cada unha das estacións do ano. Segundo a estación prográmanse actividades acordes ao tempo, ás festividades e acontecementos desa época.
A campaña de inverno presenta unha actividade enmarcada na celebración do Día Internacional da Muller, cunha ruta guiada e interpretada. Tamén se recorda á veciñanza que todo este mes, coincidindo co Entroido, a hostalaría e establecementos de panadería teñen dispoñibles os produtos típicos destas datas.
A campaña de primavera céntrase nas rutas guiadas e teatralizadas, dando a coñecer lugares emblemáticos do municipio, batallas históricas como a de Cacheiras e lendas xacobeas como a da Raíña Lupa, que reforzan o interese de Teo como etapa do Camiño Portugués e como enclave de importantes vías culturais e históricas.
No verán será a quenda da arte rupestre teense, co fin de dar a coñecer os seus tesouros e poñelos en valor entre a propia veciñanza. Rutas onde poder admirar a beleza dos numerosos cruceiros que engalanan o territorio, rutas onde descubrir fragas, árbores senlleiras, conectar coa natureza e facelo en familia.
O outono preséntase en Teo con xornadas micolóxicas e rutas polo románico teense e polas distintas pontes e pontellas, da man da asociación cultural de divulgación e protección de arte rupestre “Colectivo A Rula”. Rematando o ano coas características actividades de Nadal.
En cada unha desas campañas, coincidentes coas estacións do ano, sempre hai un evento principal. En primavera, a tan esperada Festa da Nai; no verán, o Concurso Morfolóxico Cabalar coa súa XXIV edición; no outono, a tan prezada Festa Cabalar do San Martiño de Francos; o inverno, coa tempada de Nadal e a chegada dos Reis Magos.
Por último, cómpre salientar que cada unha das actividades programadas contará co seu correspondente cartel e promocionarase na páxina web do Concello e nas redes sociais municipais.
Desta forma, os interesados poderán inscribirse con tempo nas actividades e poder desfrutar así dun calendario pensado para a xente en xeral e a veciñanza de Teo en particular.
