Bisbarra, 15 de xullo do 2022 – A solicitude, á subdelegación do Goberno, dos permisos necesarios para a apertura dun taller pirotécnico en Teo provoca a preocupación dos veciños e a oposición dos grupos municipais.
Hai un ano o departamento de urbanismo, aínda coa socialista Uxía Lemus como concelleira, arquivou de xeito definitivo a última solicitude de licenza para a legalización da pirotecnia de Sollans. Esta denegación obriga aos propietarios a iniciar un novo proceso que ten que comezar pola solicitude á subdelegación.
O organismo informou ao concello da exposición pública da petición por un período de vinte dias. O equipo de goberno convocou unha reunión veciñal para onte xoves co fin de explicar a situación e o novo escenario. Na reunión animouse á veciñanza a presentar as alegacións oportunas.
Pola súa banda a voceira socialista, Uxía Lemus, mantivo unha conversa telefónica coa subdelegada do Goberno, María Rivas, co fin de trasladarlle a oposición veciñal e valorar as posibles alegacións.
O trámite que ven de comezar é unicamente a solicitude dun informe previo a subdelegación. Tras el os impulsores da nova pirotecnia precisan a licenza de obra e de actividade, ambas as dúas de competencia municipal. O arquivo da licenza anterior comezara no ano 2016 e chegou a supoñer unha denuncia penal por prevaricación contra a concelleira Uxía Lemus que foi finalmente arquivada.
Lemus indica que “durante os últimos anos, cando estabamos no goberno municipal, amosamos con feitos a determinación dos e das Socialistas de Teo contra esa reapertura. Agora, desde a oposición, faremos todo o que está nas nosas mans para loitar contra a reapertura da Pirotecnia en Solláns, reafirmando o noso compromiso coa veciñanza nesta loita común”.
