Bisbarra, 29 de outubro do 2022 – O concello de Teo ven de avanzar a programación do san Martiño 2022, a feira cabalar máis antiga da contorna.
A carballeira de Francos volverase a encher de feira e festa o 11 de novembro. A música e o cabalo serán os dous ingredientes que protagonizan o cartel. María López, concelleira de Turismo, destaca que “este ano traballaremos para darlle ao cabalo o lugar que merece na feira”
A programación comeza o sábado 5 de novembro cunhas xornadas formativas sobre a cría e o coidado da cabalaría. Será na carpa municipal, na carballeira, en horario de mañá e tarde. Esta actividade organízase en colaboración co colectivo Amigos do cabalo de Teo.
Esa mesma xornada as nove da noite terá lugar un concerto de Treixadura. Será de balde tamén na carballeira, o escenario central de toda a programación. Con máis de 30 anos de historia, Treixadura trae a Teo un espectáculo no que se combina a música de raíz cunha visión actual da música tradicional galega.
O domingo 6 celebrarase a Feiriña, un evento pensado para as familias con crianzas. Como o ano anterior contará con música en directo, obradoiros para crianzas e paseos a cabalo.
Na mañá do domingo 6 tamén se fará un roteiro, programado dende o departamento de deportes. Ás 10:30 horas sairán da Casa Común de Francos para facer a ruta das tres aldeas. Para participar hai que inscribirse en https://www.teo.gal/gl/actividades a partir de primeiros de mes.
Ollares do San Martiño
O mércores 9 inaugúrase a exposición fotográfica Ollares do San Martiño, con imaxes dos fotógrafos Óscar Corral e Noel Feans e da fotógrafa Uma Lopes, realizadas na feira do ano pasado. Na última edición “contamos con estas tres miradas artísticas sobre a feira e este ano queremos compartir parte deste traballo, primeiro nunha exposición na contorna e logo presentando un espazo na web municipal que aloxará o material gráfico” indica a concelleira María López.
Véspera
Aínda que a feira cabalar só se celebra o 11 nos días previos xa están instaladas as carpas do polbo e moita xente da contorna achégase a tomalo, sobre todo na noite do día 10. Nesa xornada tamén se celebrarán os tradicionais cantos de taberna.
Feira e mercado
O 11 chega o día grande no que os cabalos chegan á feira ben cedo. Porque o San Martiño é unha feira cabalar na que a compravenda de animais segue sendo un elemento destacado. Ao carón dos animais tamén teremos espazo e tempo para o mercado tradicional e este ano para unha mostra de razas equinas e de gornicións. Contaremos de novo coa barraca de Barriga Verede con funcións ao longo do día e música e espectáculos en directo como o Ce Pantasma ás 18:30 horas animando a feira.
Refeira
Neste 2022 a festa non remata coa feira. O sábado 12 prográmase a refeira co concerto de Boyanka Kostova. Será na carballeira, ás 21:00 horas de balde. Boyanka Kostovo é unha banda galega formada por Cibrán García e Chicho no ano 2016 que presentan unha proposta musical que conecta co trap e coa música urbana.
O domingo 13 péchase o amplo programa do San Martiño cun magosto reivindicativo a cargo de Carlos Santiago co gallo do vinte aniversario da desfeita do “Prestige” e do “Nunca Máis”. Será na carpa municipal ás 17:30 horas.
