Teo, 8 de setembro do 2020 – Subir ao teito do concello de Teo, é o que propón nunha ruta de sendeirismo do departamento de deportes municipal.
Este mes de setembro Teo comeza a programación de roteiros que teñen unha periodicidade mensual. Son doce rutas coas que coñecer un pouco mellor o concello e co obxectivo de converter estes camiños en lugares habituais para os paseos da veciñanza.
O 20 de setembro a primeira das rutas ten como motivación coñecer o lugar máis alto do municipio, de aí o nome de O teito de Teo. Comezando as 10.30 da mañá desde o cruce entre Rarís e Lampai, no lugar de Loureiro, pasarase por Berxaus e Rial do Mato para chegar ao Chan do Pouso volvendo posteriormente a Loureiro. Son sete kilómetros nunha ruta considerada de dificultade baixa.
É preciso anotarse enviando un correo electrónico a deportes@teo.gal ou chamando ao número 981815700.
