Teo, 16 de xuño do 2022 – O goberno de Teo ao completo organizou, na tarde de onte mércores, unha reunión informativa sobre a situación da canteira da Casalonga.
Pese a certos momentos de tensión a reunión transcorreu dentro da normalidade. O alcalde, Rafa Sisto, explicou a postura do goberno sobre a expropiación da pista que rodeira a canteira e sobre outras cuestións.
A postura defendida polo goberno municipal na asemblea foi a xa exposta polo alcalde na entrevista que publicamos o pasado 30 de maio: a expropiación foi autorizada pola Xunta de Galicia e polo tanto a empresa conta cun título de propiedade que fai que presentar alegacións ante o catastro non serva de nada.
Sisto escoitou críticas pola falta de información sobre os escritos que chegaban ao concello. O alcalde explicou que tiveran coñecemento da expropiación o día 2 de maio. Engadiu que os escritos que chegan do catastro, varios cada día, non son revisados xa que son os títulos de propiedade os que realmente teñen un valor legal. Para o equipo de Sisto alegar ate o catastro sería tamén contraproducente porque a resposta sería negativa e o concello non necesita ter respostas en contra.
Negociar ou non
O momento que máis polémica xerou foi a posibilidade de sentarse a negociar coa empresa sobre a adquisición da canteira. Rafa Sisto defendeu de novo que calquera conversa pasa por deixar claro que o primeiro e rematar o plan de restauración e eliminar a cuadricula mineira, algo co que non coincidían varios dos presentes
O alcalde puxo sobre a mesa outros problemas que non aparecen habitualmente nos debates sobre a compra da canteira. Sisto explicou os perigos que supón o estado do lugar na actualidade
O outro debate que xerou algo de polémica foi a intención da Plataforma Casalonga Limpa de Residuos de crear unha comisión negociadora. O colectivo convocara a todas as forzas políticas a unha reunión á que non asistiu ninguén do goberno municipal. Rafa Sisto explicou que non entendía a necesidade dunha comisión negociadora tendo xa unha comisión creada na que estaban todos os partidos e a Plataforma.
A reunión tivo lugar na Casa común de Francos e pasadas as nove e media da noite aínda continuaba.
