Bisbarra, 21 de decembro do 2024 – O Concello de Teo convoca o Concurso de curtas xuvenil 2024 baixo o título “Historias que nos moven”.
Este certame de curtas pretende promover a cultura creativa e a participación social entre a súa mocidade, fomentando a expresión artística e o desenvolvemento das habilidades audiovisuais.
O Goberno local busca coñecer as inquedanzas da súa xuventude, fomentar a empatía entre eles e os comportamentos positivos. Só poderán participar mozos e mozas de entre 12 e 18 anos, ambos incluídos, que estean empadroados no Concello de Teo.
O prazo para a presentación de curtas comeza hoxe sábado día 21, coincidindo co Día Mundial da Curtametraxe, e rematará o vindeiro 21 de febreiro. Os participantes poderán presentar pezasque traten temas de interese social, emocional ou da vida cotiá como a amizade, o ambiente, a igualdade, os soños, a prevención do acoso escolar, etc.
As curtas realizaranse con dispositivos móbiles e as gravacións faranse preferentemente en Teo. A duración non poderá superar os catro minutos, incluídos o título e créditos. Os traballos poderán ser individuais ou grupais e poderanse presentar máis dun traballo por persoa ou grupo participante.
Xurado e premios
O xurado estará formado por profesionais do mundo audiovisual, da educación, de mocidade e persoal do Departamento de Cultura. Valorarase a mensaxe da curta e o seu impacto, ademais da súa orixinalidade e creatividade.
Este concurso estará dotado cun primeiro premio de 200 euros e un certificado, o segundo premio con 125 euros e certificado e o terceiro premio con 75 euros e certificado. A gala de entrega de premios levarase a cabo de xeito presencial presentando as curtas e proxectaranse as gañadoras, tanto no evento como nas redes sociais do Concello e na páxina web.
As bases deste certame están colgadas na páxina web do Concello para que poidan ser consultadas por toda persoa interesada.
