Bisbarra, 27 de outubro do 2022 – Rafa Sisto, Son de Teo, conseguiu sacar adiante o estudo da municipalización do servizo de recollida de lixo grazas ás abstencións do Partido Popular e do BNG.
O Psoe votou en contra da proposta de municipalización do servizo de lixo. Os socialistas consideran que non se pode tomar unha decisión sen informes de técnicos expertos. Criticaron especialmente que o alcalde presentara un informe de corenta páxinas realizado por el mesmo. Os socialistas tamén se mostraron contrarios a solicitude dun préstamo bancario de un millón novecentos mil euros que segundo o informe é necesario para comezar o proceso.
O alcalde foi respondendo aos distintos grupos a medida que interviñan. Insistiu en todo momento que só se trataba do estudo e que o informe presentado, realizado por el mesmo, era só unha guía. Rafa Sisto mesmo ofreceu a creación dunha comisión mixta na que estiveran técnicos e políticos e na que os grupos municipais tiveran dereito de veto para que as decisións volveran ao pleno.
O BNG nas súas intervencións mostrou tamén serias dúbidas sobre o informe e explicou o que, desde o seu punto de vista, eran distintas contradicións. No momento de votar optaron pola abstención xa que “están a favor da municipalización pero non contan cos datos suficientes”.
A postura máis sorprendente foi a do Partido Popular que finalmente facilitaría a aprobación coa súa abstención. O concelleiro Antonio Reyes presentou na primeira intervención ata 9 preguntas sobre o informe presentado e na segunda chegou a dicir que “nunca estivemos en contra da municipalización [] sempre estivemos en contra da forma na que se estivo facendo”.
A única liña roxa que puxo o Partido Popular foi a suba da taxa no rural, da que dixeron que non aceptarían en ningún caso. A proposta presentada inclúe explicitamente unha subida similar ao IPC ano a ano.