O Centro de Día de Teo foi unha das promesas repetidas da actual alcaldesa, Lucía Calvo, durante a campaña electoral do 2023. Foi tamén unha das súas teimas desde que chegou ao despacho e o certo e que xa ninguén dubida do proxecto.
O concello ven de asinar un convenio coa conselleira de Política Social e Igualdade para adecuar o local onde se situará o Centro de Día, A Conselleira, Fabiola García, e a alcaldesa, Lucía Calvo, asinaron o acordo.
O espazo que se destinará a centro de día ocupa unha superficie útil de 532,62 m², dotado con 40 prazas, o cal supera a superficie mínima esixida pola normativa. O deseño proposto organizarase en zonas diferenciadas como a de actividades, a sala polivalente, o comedor e a cociña con office e almacén auxiliar; así como diversos espazos máis funcionais, técnicos e de atención personalizada.
O futuro Centro de Día ten como finalidade mellorar a calidade de vida e o benestar das persoas maiores do municipio de Teo que precisan deste recurso asistencial para dar resposta ás súas necesidades.
O acordo asinado por Alcaldesa e Conselleira suporá un investimento de 600.000 euros. O edificio que se remodelará está illado e conta cunha superficie construída de 910 metros cadrados, dos cales 829,40 m² son de superficie útil.
O espazo que se destinará a centro de día ocupa unha superficie útil de 532,62 m², superando así a superficie mínima esixida pola normativa. Namentres, os 296,78 m² restantes reservaranse como área de posible ampliación futura do centro.
A entrada principal situarase nunha posición central e, a partir do dito acceso, organizarase o centro en dúas zonas diferenciadas. Á dereita da entrada situaranse os espazos de maior dinamismo e participación colectiva, como son a zona de actividades, a sala polivalente, o comedor e a cociña con office e almacén auxiliar.
Á esquerda da entrada estarán os espazos máis funcionais, técnicos e de atención personalizada, tales como os despachos administrativos, a sala de atención social e enfermería, os vestiarios e aseos do persoal e o cuarto de instalacións. Desta forma, garantirase o cumprimento do programa funcional obrigatorio.
No extremo esquerdo, trala zona técnica, atoparase un almacén extra que se poderá habilitar nun futuro como ampliación do centro, ben sexa para aumentar a capacidade de usuarios ou para incorporar novas áreas de atención especializada.
O deseño proposto para o futuro Centro de Día incorpora criterios de accesibilidade universal, confort térmico e acústico, eficiencia enerxética, seguridade contra incendios e sinalización cognitiva, conforme aos estándares esixidos para a súa acreditación como centro de servicios sociais.
Todo iso garantirá que o edificio cumpra as condicións necesarias para obter a autorización administrativa previa ao inicio da actividade como centro de día, conforme ao réxime establecido pola Xunta de Galicia.
Por último, procederase á urbanización da contorna do edificio, cunha dobre zona de aparcamento e de manobra que permitirá o correcto desenvolvemento da actividade do centro.
Cabe sinalar que, este centro, permitirá tamén ofrecer un servizo de conciliación ás familias das persoas maiores, que a día de hoxe desprázanse a concellos veciños para poder desfrutar deste servizo.
A poboación maior do municipio supera os 4.000 habitantes con máis de 65 anos. Por iso, insistiu a rexedora local, que se trata dun proxecto vital para o concello de Teo, xa que ofrecerá un servizo básico e fundamental para o desfrute da xente maior.
