Bisbarra, 26 de marzo do 2024 – O concello de Teo ven de investir 200.000 euros na reurbanización da aldea de Socastro, na parroquia de San Xoán de Calo.
Os traballos consistiron na renovación das súas rúas interiores e na súa rede de saneamento. A alcaldesa de Teo, Lucía Calvo, acompañada polo arquitecto municipal, supervisou de primeira o resultado destas actuacións.
As obras foron financiadas por fondos do POS+ 2021 da Deputación da Coruña. As pistas interiores da aldea recibiron un novo pavimento que, segundo a zona, foi de formigón cun acabado superficial rugoso e delimitado en varios tramos cunhas franxas transversais de lastras. As pistas máis distantes do núcleo foron pavimentadas cunha mestura bituminosa en quente.
As vías interiores de Socastro estaban moi deterioradas a causa das inclemencias meteorolóxicas e o paso de vehículos. O obxectivo do concello de Teo con estes traballos era conseguir uns accesos máis adecuados ao núcleo de Socastro ao tempo que se mellora a seguridade vial.
Teo aproveitou para completar tanto a rede de abastecemento de auga potable como a rede de augas residuais, garantindo o servizo a todas as vivendas e solares vacantes de edificación. Renovouse practicamente toda a rede e instalouse a infraestrutura necesaria para dotar de iluminación pública cunha rede de subministro totalmente soterrada.
