A estrada une o campo da Cañoteira con Cacheiras e a mellora consistiu na limpeza da gabias e mellora da capa de rodaxe.
O Concello de Teo, a través dun convenio de colaboración coa Consellería de Presidencia, Xustiza e Deportes, rematou a obra de afirmado e acondicionamento do viario municipal que dá acceso ao campo de fútbol A Cañoteira, na parroquia de Cacheiras. O importe desta actuación, subvencionado ao 100% polo Goberno galego, superou os 48.000 euros.
A estrada da Cañoteira estaba en moi malas condicións, debido á falta de mantemento dos últimos anos, ao alto tráfico de vehículos diarios que discorren por esta vía e ás propias inclemencias meteorolóxicas.
Detectáronse tamén varias fugas de auga acontecidas na rede soterrada de abastecemento que provocaron afundimentos e fochancas en distintas zonas localizadas, o que tamén alterou de forma considerable a propia rasante da estrada.
O proxecto de mellora consistiu na limpeza da gabias e mellora da capa de rodaxe, mediante o asfaltado dun tramo de lonxitude total duns 470 metros, con anchuras variables, e unha superficie aglomerada de 3.828 metros cadrados.
Tamén se procedeu ao recrecido de 27 tapas de rexistro e imbornais existentes ata a cota final de acabado, así como á sinalización horizontal e vertical con pintado de liñas e bordos e colocación de sinais.
Coa obra da Cañoteira mellorouse considerablemente as condicións de seguridade da vía, para viandantes e para o tráfico rodado, acadando uns accesos cómodos, funcionais e axeitados para os usuarios. A alcaldesa, Lucía Calvo de la Uz, xunto co arquitecto municipal, achegouse ata a zona para supervisar o resultado das obras, quedando moi conforme co resultado acadado.
