Máis de seiscentos mil euros son os que destina o concello de Teo a adecuación do futuro centro de dia municipal. A licitación ven de ser publicada na Plataforma de Contratos do Sector Público e no perfil do contratante da web do concello.
O importe concreto para o centro de día de Teo alcanza os 646.736,4 euros e o prazo para a presentación de ofertas remata o 22 de xaneiro. O edificio conta cunha superficie útil de 829,40 m², dos cales 532,62 m² se dedicarán ao centro de día e os 296,78 m² restantes reservaranse para unha posible ampliación futura.
O deseño proposto incorpora criterios de accesibilidade universal, confort térmico e acústico, eficiencia enerxética, seguridade contra incendios e sinalización cognitiva, conforme aos estándares esixidos para a súa acreditación como centro de servicios sociais.
Ademais de adaptar o seu interior, tamén se procederá á urbanización da contorna do edificio, cunha dobre zona de aparcamento e de manobra que permitirá o correcto desenvolvemento da actividade do centro de día.
En canto ao deseño interior do edificio, este contará con dúas zonas diferenciadas: unha dedicada aos espazos de maior dinamismo e participación colectiva, como son a zona de actividades, a sala polivalente, o comedor e a cociña con office e almacén auxiliar; e a outra para os espazos máis funcionais, técnicos e de atención personalizada, tales como os despachos administrativos, a sala de atención social e enfermería, os vestiarios e aseos do persoal e o cuarto de instalacións.
