Bisbarra, 2 de xaneiro do 2025 – O Concello de Teo vén de adquirir un inmoble situado en Cacheiras para proxectar alí o seu primeiro Centro de Día.
A compra levouse a cabo grazas a un convenio de colaboración co Consorcio Galego de Servizos de Igualdade e Benestar, dependente da Consellería de Política Social e Igualdade da Xunta de Galicia, o cal financia integramente a adquisición para o Centro de Día..
Ata o momento, o municipio de Teo carecía deste servizo. Preto dunha trintena de persoas maiores do Concello vense obrigadas a utilizar este tipo de servizos fóra do municipio. O Centro de Día fora unha das promesas electorais do actual grupo de goberno.
Coa construción deste Centro de Día, o Concello de Teo contará cun recurso para a conciliación da vida persoal e familiar, proporcionando atención integral ás persoas maiores.
No municipio a poboación maior do concello representa unha alta porcentaxe, pois supera os 4.000 habitantes con máis de 65 anos. Por iso, salientou a alcaldesa, Lucía Calvo de la Uz, que este Centro de Día é unha prioridade para o seu Goberno, tal e como recollía o seu programa electoral.
Ao longo de este ano procederase a elaborar o proxecto técnico, co fin de poder iniciar canto antes a reforma integral deste local, o cal conta cunha superficie de 1.000 metros cadrados.
As previsións iniciais que manexa o Goberno local é poder contar co novo Centro de Día cara finais do vindeiro ano, estando sempre suxeito ao correcto desenvolvemento das obras.
