Bisbarra, 16 de outubro do 2024 – Con motivo do Día Internacional da Muller Rural, que se celebra cada 15 de outubro, o Concello de Teo programa para este sábado diversas actividades.
A xornada terá lugar no centro cultural A Ponte Vella durante toda a mañá. Comezará ás 10.00 coa presentación da exposición “Historias de Vida” que recolle relatos, anécdotas e experiencias vitais das mulleres de Teo, contado por elas mesmas.
Toda a información foi conseguida previamente polas técnicas do Centro de Información á Muller (CIM) de Teo a través dun pequeno obradoiro onde as participantes expuxeron e acordaron a mellor forma de visualizar as súas vivencias.
Seguidamente, celebrarase o obradoiro “Herbas das mulleres”, onde se abordará a medicina tradicional desde unha perspectiva de xénero. As bruxas vistas como “médicas”, as parteiras como “obstetras”, ou as atadoras como “fisioterapeutas”. Abordaranse as principais plantas medicinais da contorna, que están suxeitas á época do ano, achegando unha serie de plantas vivas que sirvan para dinamizar o faladoiro e para achegar o coñecemento popular sobre herbas menciñeiras.
Durante toda a exposición motivarase ás participantes a poñer en común receitas, saberes e coñecementos para ir tecendo a medicina popular. Desta referencia concreta e local faranse prolongacións a perspectivas máis amplas, como as abaladas pola ciencia, as popularizadas desde outras filosofías médicas como a oriental etc.
Para rematar, as participantes no obradoiro poderán elaborar un bálsamo medicinal. A última actividade desta xornada estará centrada nunha escape room sobre o papel de mulleres que cambiaron o transcorrer do mundo en diversos sectores, pensado para a toda a familia.
Asociacións locais Durante toda a xornada tamén haberá un posto da Asociación de Mulleres Rurais de Teo e outro da Asociación Teenses pola Igualdade, onde os asistentes poderán coñecer o funcionamento e o traballo que realizan durante todo o ano estes colectivos locais. Así mesmo, estará exposto o traxe tradicional da muller da Asociación a Ponte Vella.
