Bisbarra, 24 de outubro do 2024 – Unha idea comentada moitas veces pero que nunca parece ser tomada en serio; agora o concello de Teo a formaliza ante o Ministerio de Transportes: un acceso á autoestrada AP-9.
O obxectivo de Teo é mellorar o tráfico rodado ao seu paso polo concello. Ë un dos poucos municipios que, pese a ser atravesado de norte a sur pola autoestrada, non ten un acceso á mesma. Ao mesmo tempo sería un xeito de aliviar os problemas das obras do Milladoiro na N-550.
Con esta solicitude preténdese dotar a Teo de dita conexión, a cal non suporía ningunha merma dos ingresos na concesionaria, xa que a entrada se situaría dentro do tramo denominado Santiago norte-Santiago sur, actualmente libre de peaxe.
Este novo enlace permitiría conectar a dita autopista coa estrada provincial CP-8202, o que evitaría un importante fluxo de tráfico, xa que para empregar a AP-9 con dirección sur, os usuarios necesitan desprazarse en sentido contrario cara o norte ata as saídas de Santiago O Milladoiro para poder coller o enlace máis próximo. Ese enlace actual está, en momentos puntuais, saturado con considerables retencións, as cales serán maiores cando comecen as obras de humanización do Milladoiro.
Polo tanto, atendendo a unha necesidade real da veciñanza de Teo e dos municipios limítrofes, o Concello considera máis que necesario realizar un estudo de viabilidade para abrir esta nova entrada con dirección Vigo e unha saída para os vehículos que proceden de dita cidade unha vez superada a peaxe.
A alcaldesa de Teo, Lucía Calvo. destaca que esta pode ser tamén unha moi boa solución ao problema que o propio Ministerio creou ao seguir adiante coas obras de humanización do Milladoiro, xa que non ofreceu ningunha alternativa real para evitar os futuros atascos que vai ocasionar este proxecto.
Este novo posible acceso á AP-9 suavizaría o tráfico rodado, o cal suporía tamén beneficios cara o medio ambiente.
