Bisbarra, 19 de setembro do 2024 – O Concello de Teo vén de renovar o convenio de colaboración coa Universidade de Santiago de Compostela, USC, en materia de asesoramento enerxético e atención do punto de información para a veciñanza.
Teo e a USC acordaron tamén novas medidas enmarcadas na Axenda Urbana 2024. A alcaldesa, Lucía Calvo de la Uz, e a profesora adscrita ao Departamento de Economía Aplicada da Facultade de Ciencias Económicas e Empresariais, Rosa María Regueiro, formalizaron a dita renovación na Casa Consistorial.
Este servizo de asesoramento vense dando desde hai anos e seguirá un ano máis coa intención de manter informados a veciñanza de Teo sobre as facturas eléctricas. Neste senso, o servizo que se ofrece é de aconsellar, por parte dos técnicos da USC, sobre o impacto da pobreza, da vulnerabilidade e das desigualdades enerxéticas, ofrecendo alternativas para conseguir aforros nas facturas eléctricas, así como outras posibles melloras nas prestacións.
Ademais a veciñanza tamén pode consultar se pode solicitar o bono social eléctrico e cales son os requisitos que debe cumprir unha persoa para ser considerada consumidora vulnerable.
Este servizo prestase na Casa Consistorial todos os mércores, no Salón de Plenos, en horario de 10.00 a 12.00 horas. Así mesmo, o novo convenio tamén inclúe charlas de boas prácticas para o aforro enerxético nos fogares, que se levarán a cabo polas parroquias para facilitar a asistencia ás mesmas.
