Bisbarra, 7 de xuño do 2024 – A alcaldesa de Teo, Lucía Calvo, reuniuse cunha representación da empresa UTE Geseco-Cespa para mediar entre as partes afectadas polo actual conflito laboral.
A empresa presta o servizo de recollida de lixo e limpeza viaria en Teo. Na reunión participaron ademais os concelleiros de Medio Ambiente, Rogelio Lema, e o de Relacións Veciñais, Juan Cerqueiro. A rexedora manifestou a súa preocupación ante a situación actual, trasladada xa polo comité sindical o pasado 12 de marzo.
Lucía Calvo reiteroulles, ao igual que na anterior xuntanza do 11 de abril, a súa vontade de tender pontes de entendemento entre as partes afectadas e salientou a importancia de que ambas partes se reúnan para tratar de achegar posturas.
Por parte do Concello, lembrou a rexedora, estase traballando no proceso de licitación para corrixir a irregular situación herdada do anterior executivo, xa que o actual contrato de limpeza con esta empresa leva anos en precario. “Entre todos debemos arrimar o ombreiro para acadar unha situación armoniosa, posto que se trata dun servizo esencial para toda a veciñanza de Teo”, remarcou a alcaldesa de Teo.
Ao igual que fixo na xuntanza mantida coa representación sindical da empresa, Lucía Calvo de la Uz apelou á boa vontade entre todas as partes.
