Bisbarra, 2 de setembro do 2024 – O concello de Teo busca fomentar o consumo no comercio local cunha campaña audiovisual que mostra a cantidade, e variedade, de negocios situados no municipio.
Trátase dunha campaña que márcase o obxectivo de dar visibilidade a todo tipo de negocios, incluíndo sectores como a alimentación, téxtil, hixiene, etc. Contouse coa colaboración dos propios comerciantes que non dubidaron en prestar a súa voz e imaxe para así impulsar a compra en Teo.
Unha iniciativa que tivo moi boa acollida entre os empresarios. “Queremos axudar aos novos veciños e veciñas porque son o motor económico do noso territorio”, matizou a alcaldesa Lucía Calvo. Neste senso, a rexedora salientou que é importante, por parte da Administración local, axudar na medida das súas posibilidades ao sector empresarial porque son unha parte vital do correcto desenvolvemento do municipio.
Este xesto por parte do Goberno local estenderase, nos vindeiros meses, ao sector da hostalaría e restauración, tamén co obxectivo de potenciar o consumo local e dar a coñecer entre a poboación toda a oferta que presenta este municipio de case 20.000 habitantes e situado ás portas da capital galega.
Campaña turística
Esta campaña audiovisual súmase á presentada a comezos de ano: “REDEscubre Teo 2024”, a primeira campaña turística e cultural planificada e orzamentada cunha calendarización anual, froito da vontade política do actual Goberno por apostar polo desenvolvemento turístico sostible do municipio. Desta forma, o Concello creou para todo o ano un amplo abano de oferta complementaria dirixida a todos os públicos, co fin de convidar á veciñanza a ser partícipes das numerosas actividades onde se descobre o concello. Para os visitantes presentouse tamén unha ampla oferta turística e cultural acorde ás novas tendencias de comportamento turístico
