Teo, 01/07/2026 – Teo comeza hoxe unha campaña de información e divulgación da fracción orgánica, baixo o lema “Ti tes a chave”. A veciñanza dos núcleos urbanos recibirán información sobre os colectores marróns, poderán darse de alta no programa e recoller o seu kit composto por caldeiro, bolsas compostables, chave e folleto informativo.
O colector marrón, a quinta fracción, ten como uso exclusivo a recollida de residuos orgánicos. Este novo depósito ten a particularidade de estar pechado coa finalidade de concienciar á veciñanza da separación de residuos orgánicos.
O concello de Teo céntrase en este caso na poboación que habita no núcleo urbano onde existen edificios en verticalidade, así como os establecementos susceptibles de xerar materia orgánica. Ao mesmo tempo a empresa adxudicataria visitará porta a porta os establecementos xeradores de biorresiduos como restaurantes, froitarías, supermercados e outros, co fin de informarlles sobre a fracción orgánica e ter un rexistro de establecementos interesados.
Teo colocará 150 contedores marróns en diversos puntos dos núcleos urbanos das parroquias dos Tilos, Cacheiras, Calo, Oza e Lucí. Situaranse de forma progresiva a partir de mediados do mes de xullo, reforzando así a recollida separada de residuos no casco urbano, sendo este proxecto totalmente voluntario para a cidadanía.
Hoxe comeza en Teo a campaña de sensibilización e divulgación sobre o colector marrón. Será na rúa Loureiro, xunto ao estacionamento do Centro Comercial Os Tilos en horario de 10.00 a 14.00 horas. A segunda será o 8 de xullo na Travesía de Montouto, á altura da cafetería Maradentro (na praza peonil), no mesmo horario. O resto iranse comunicando nas redes sociais do Concello de Teo.
