Teo, 1 de agosto do 2019 – BNG e Goberno Municipal de Teo dan pequenos pasos atrás para poder avanzar e deixan vía libre aos soldos para alcalde e concelleiros.
Unha proposta presentada sen previo aviso polo alcalde. Rafa Sisto, que levou ao BNG a ter que pedir un receso para consultar co partido que postura adoptar. A abstención dos nacionalistas posibilitou finalmente dotar de soldos ao rexedor e concelleiros e pecha por fin o capitulo de organización.
Rafa Sisto propuxo, e conseguiu aprobar, unha masa salarial total similar á do 2015, 185.000 euros brutos. Tamén diminuíu unha das nóminas parciais dun 75% a un 50% co que quedan en total en 5,5 dedicacións, media máis das que poñía como límite o BNG.
Salarios
O alcalde pasa de 42.000 euros, primeira proposta, a 40.000 € brutos ano. As dedicacións exclusivas pasan de 32.000 € a 30.000 € e a parcial baixa de 25.800 € a 17.000 €.
Con soldos pero nada máis
O BNG expresaba tras o pleno que “o noso obxectivo non era, como dicía o Alcalde, impedir a labor de goberno senón que, e tendo en conta a correlación de forzas, recuperar o diálogo como práctica normal en Teo e lograr consensos fronte á actitude de imposición destes últimos anos por parte do goberno municipal”. Nunha nota de prensa os nacionalistas foron moi críticos coas formas e cargan as tintas contra o alcalde Rafa Sisto. No pleno insistiron en que a abstención non é un cheque en branco o que evidencia que o novo goberno municipal terá que negociar cada decisión de calado que queira sacar adiante.
