Bisbarra, 6 de agosto do 2024 – O concello de Teo inicia o proceso de contratación da obra de asfaltado de varias rúas municipais situadas na zona dos Tilos.
Estas rúas dos Tilos están moi deterioradas con descarnaduras, fendas e fochancas distribuidas de maneira xeralizada pola súa superficie. Unha situación que fai que sexan case inservibles.
O actual deterioro das rúas Ameneiro, Castiñeiro e Carballo é consecuencia tanto da antigüidade do último pavimentado como das inclemencias meteorolóxicas propias do paso do tempo. Tamén inflúe o propio desgaste ocasionado polo uso do mesmo, con moito tráfico rodado por estas vías.
As actuacións previstas pretenden resolver o deficitario estado de conservación dos pavimentos da calzada xa que o seu estado impide o correcto uso polo cidadán. O obxectivo final é mellorar o desprazamento por estas vías e reforzar a seguridade viaria nos Tilos.
As obras ademais de mellorar os accesos existentes e a sinalización, consistirán fundamentalmente na mellora da capa de rodaxe das pistas, incluíndo a limpeza de gabias. Procederase ao reasfaltado de calzada, previa reparación de baches e perfilado de mordentes ao 10% da superficie con aglomerado asfáltico.
O tramo a arranxar comprende unha lonxitude total duns 1.500 metros con anchuras variables e cunha superficie total a aglomerar de 12.725 m². Tamén se levará a cabo o recrecido de dezanove tapas de rexistro existentes ata a cota final de acabado e procederase á sinalización horizontal e vertical con pintado de liñas en bordos e colocación de sinais.
O orzamento previsto para esta actuación ascende a 190.869,82 euros e o prazo de execución estímase nun dous meses. A licitación do contrato sairá nas vindeiras semanas na Plataforma de Contratación do Sector Público.
