Teo, 16 de xullo do 2017 – A corporación teense reúnese este luns 17 de xuño en sesión extraordinaria ás 20:00 horas para debater os orzamentos municipais do 2017 nunha sesión que tamén se retransmitirá por vídeo na web municipal.
O pleno do Concello de Teo debaterá mañá luns os orzamentos municipais para este ano que chegan ós 15.879.061 euros. O alcalde, Rafael Sisto, responsable de economía e facenda, destaca que “a pesar de tratarse duns orzamentos de case tres millóns máis que os anteriores son tremendamente realistas por ter vinculado un plan económico financeiro”. Na liquidación do exercicio 2016 constatouse un incumprimento da estabilidade orzamentaria e da regra de gasto. Este feito esixiu que as contas municipais se realizaran observando estritamente o cumprimento destes parámetros.
A aprobación do Plan de Estabilidade Financeira tamén motivou o retraso na tramitación dos orzamentos xa que para poder facelos houbo que esperar a que estivera aprobada a liquidación do ano pasado.
As contas municipais deseñan unha estrutura cun capítulo de investimentos moi importante, máis de tres millóns de euros, no que según o alcalde “apostamos claramente pola mellora de servizos básicos como son abastecemento e saneamento ou rede viaria sen descoidar os equipamentos públicos ou a mellora na eficiencia enerxética”. Ademais deste esforzo inversor “para este goberno é irrenunciable manter e mellorar no posible as políticas que se están aplicando actualmente en ámbitos como o benestar, conciliación, sostenibilidade, fomento do emprego ou no ámbito da cultura e da participación cidadá” destaca o rexedor. Trátanse duns orzamentos “que garanten o mantemento das conquistas sociais acadadas pero que non renuncia a novos retos”.
O capítulo de persoal é outro dos que teñen un incremento significativo xa que nel se recollen o persoal subrogado daqueles servizos que xa están municipalizados e cos que se pode garantir unha xestión máis eficiente dos mesmos. O primeiro foi o servizo municipal de Augas que é de xestión directa dende outubro do 2015 e no que xa se pode facer unha valoración positiva do funcionamento. En este apartado tamén se contempla a contratación dun responsable de recursos humanos co que se agarda mellorar a xestión do cadro de persoal e poder avanzar na contratación doutros postos como o de responsable informático encargado da administración electrónica ou o de tesoureiro na futura oficina de recadación municipal.
